भूकम्पबाट सुरक्षित हुने चेतना सबैले राख्नुपर्छ’

Featured विशेष समाचार समाज

विराटनगर, २७ पुस (रासस) : भूकम्पबाट तत्काल जोेगिन ‘घुँडा टेकी गुडुल्की, ओत लागि समात’ भन्ने चेतना सबैले राख्नुपर्ने औँल्याइएको छ ।

राष्ट्रिय भूकम्प सुरक्षा दिवस २०७५ माघ २ गते आम नागरिकलाई सचेतना जगाउने उद्देश्यसाथ गरिएको कार्यक्रममा भूकम्पप्रतिको सचेतनाले जनधनको क्षति कम गर्न सहयोग पुग्ने नेपाल प्रहरी, नेपाली सेना र नेपाल रेडक्रस सोसाइटीका पदाधिकारीको बुझाइ छ ।

नेपालमा विसं १९९०, २०४५ र २०७२ मा आएको भूकम्पबाट धेरै नेपालीले अकालमै ज्यान गुमाउनु परेको र यसबाट धेरै सम्पत्ति पनि नष्ट भएकाले भूकम्प आउनुपूर्व, भूकम्पको अवस्थामा र भूकम्पपछि खोज तथा उद्धारमा खटिन चाहिने सामग्री राज्यले समयमै बन्दोबस्त गरी राख्नुपर्ने जिल्ला प्रशासन कार्यालय मोरङमा आज बसेको भूकम्प दिवसको सन्दर्भमा कार्यालय प्रमुखका बैठकमा सहभागीले औँल्याएका छन् ।

भूकम्पलाई रोक्न नसकिने भए पनि यसबाट बच्न सकिने उपाय अवलम्बन गर्न सकियो भने स्वयंलाई मद्दत पुग्ने विश्वास लिइएको छ । प्रमुख जिल्ला अधिकारी रमेशकुमार केसीले भवन संहिता पालना गर्नुपर्ने, भवन अरुका लागि नभई आफ्नै भएकाले उच्च गुणस्तरको सामान र प्रविधि प्रयोग गर्नुपर्ने धारणा राख्नुभयो ।

माघ २ गते भूकम्प दिवसको अवसरमा स्थानीय तहबाट ¥याली निकाल्ने, जनचेतनामूलक कार्यक्रम गर्ने र विराटनगरको हाटखोला चोकमा अपराह्न २ बजे भूकम्पबाट जोगिन सकिने प्रदर्शनी गरिने जानकारी बैठकमा गराइयो ।

Leave a Reply

Your email address will not be published. Required fields are marked *