१३ पुस, काठमाडौं । त्रिभुवन विश्वविद्यालय (त्रिवि) सेवा आयोग र विज्ञान तथा प्रविधि अध्ययन संस्थान (IoST) मा विद्यार्थी तथा पूर्व विद्यार्थीहरूले तालाबन्दी गरेका छन्। कम्प्युटर साइन्स अल्मुनाइ र विद्यार्थी एसोसिएसनले आगामी पुस १५ गते तय गरिएको ‘कम्प्युटर विज्ञान’ पदको प्रथम पत्रको परीक्षा स्थगित गर्न माग गर्दै तालाबन्दी गरेका हुन्।
मुख्य मागहरू
आन्दोलनरत पक्षले परीक्षा प्रक्रियामा गम्भीर त्रुटि रहेको औंल्याउँदै निम्न मागहरू अघि सारेका छन्:
पुनः जाँचको माग: आवेदन स्वीकृत भएका सम्पूर्ण उम्मेदवारहरूको शैक्षिक योग्यता ‘विषय समिति’को निर्णयअनुसार पुनः जाँच गरिनुपर्ने।
अन्तिम नामावली प्रकाशन: योग्यताको पूर्ण छानबिनपछि मात्रै योग्य उम्मेदवारहरूको अन्तिम नामावली सार्वजनिक गरिनुपर्ने।
नयाँ परीक्षा मिति: नामावलीको विवाद सुल्झिएपछि मात्र परीक्षाको नयाँ मिति तय गरिनुपर्ने।
विवादको कारण
एसोसिएसनले जारी गरेको विज्ञप्ति अनुसार, विज्ञापन नं. ११८५/२०८१–८२ अन्तर्गत यसअघि अयोग्य ठहरिएका व्यक्तिहरूलाई पुनः योग्य बनाइएकोमा उनीहरूको तीव्र आपत्ति छ।
“यसअघि नै अयोग्य ठहर भई नामावलीबाट हटाइएका तथा विषय र योग्यता नमिल्ने उम्मेदवारहरूलाई पुनः योग्य घोषित गरी थप नामावलीमार्फत सार्वजनिक गरिएको विषयप्रति हामी गम्भीर आपत्ति प्रकट गर्दछौं,” विज्ञप्तिमा भनिएको छ।
अवस्था: हाल आयोग र संस्थानमा तालाबन्दी जारी रहेकाले पुस १५ को परीक्षा हुने वा नहुने भन्नेबारे अन्योल सिर्जना भएको छ।
